حالك يا مصر

خفــــه دم تبكــــى

يا شعبى ياشاطر ياجابر خواطر ياساكن مقابر وساكت وعال

يا شعبى اللى نايم وسارح وهايم وفى الفقر عايم وحاله ده حال

تعالوا نكمل مع بعض فى الكليب ده

دلوقتى بقا هنشوف مع بعض الشاعر/ عبد الرحمن يوسف فى مؤتمر أدباء وفنانون ضد التعديلات الدستوره بالأسكندريه.....

ودى بقا حاجه لذيذه كدا عن الإنتخابات النزيهه فى مصر المحروسه

وبردو عشان متتسكعش على قفاااااااااك

بعد ماضحكنا شويه وبكينا من كتر الضحك على نفسنا

خد نفس عميق وأعمل ذى اخينا ده وخليــك...

*أشوفكم على خير إن شاء الله *

رســـــاله إلـــى سيدي الرئـــيس

سياده الرئيس انا اولا كدا بعتذر لحضرتك عن اى كلام اعتبرته اساءه ليك صدرت منى ف المدونه ( قبل ما اكمل كلامى مافيش اى حد يعتبر اعتذارى ده خوف) بس خلينا نتكلم بشويه عقل بعيد عن اى شعارات دايما بنسمع مصر مبارك مقلناش حاجه وحال مصر مش يخفى على اى حد واللى بيجرى ف مصر مش معقول يعنى مش عارفه ولا بتسمعه عشان كدا لو جينا نلوم حد مش هنلوم لا رئيس الوزراء ولاحتى الوزراء ولا اللى اقل منهم نلومك انت يا ريس ايون نلومك انت ونعتب عليك انت ولازم نطلع العيب فيك انت لأنك انت اللى اخترت تبقا ريسنا وزعيمنا وقائد مسيره البهدله والشقا والتخلف وانت اللى بتختار حكومتك وانت اللى بتاخد القرارات وانت وانت وانت حاجات كتير اوى ياريس وع راى المثل اللى مش يشوف من الغربال يبقا أعمى يبقا اعمى ياريس وأظن حال بلدنا يبشر انك فعلا أعمى ياريس سامحنى ع اللفظ بس هى دى الحقيقه من غير ما نهرب منها , لأننا حاولنا كتير ان احنا نحاول نعيش حياتنا حلم ونحاول نغير الحقايق نحاول نقول اللى جاى احسن بس ياريس والله ابدا , مصر مبارك يبقا اكيد لما تبقا مصر بالشكل ده يبقا مبارك بردو بالشكل ده احنا كل اللى يهمنا ان بلدنا تبقا حلوه تبقا احلى واجمل بلد ف الدنيا كلها احنا بردو بنحب بلدنا وبنحبها اوى مش بس الحكومه اللى دايما لو طلع واحد زي كدا وقال كلمتين حق بقا عميل لدوله اجنبيه وعاوز يعمل انقلاب على الحكم وعاوز وعاوز حاجات كتير اوى عند الداخليه تقدر انها تنهى بيها حياه الانسان اللى عاوز بس يعرف الحقيقه فين عاوز يعرف مين صح ومين غلط عاوز ف يوم واحد يصحى الصبح وهو مطمن على ولاده على بلده مطمن على نفسه , شباب كتير نفسهم يفضلوا فى بلدهم نفسهم يعطو بلدهم كل اللى عندهم بس بس ايه وبس ليه ......

واللى بيحزنا أكتر واللى بيخلينا هنموت من الحصره ان بلدنا كلها خير وكلها فلوس بس بتسرق بغشم وبتتنهب بردو بغشم , عارفين ان الفساد موجود فى كل بلاد العالم بس الفساد درجات ياريس ومصر فى قمه الفساد ,كله بيسرق وبيغير اسم السرقه وبيغير ضميره وبيغير نفسه وبغير حياته الموظف الصغير بيمد ايده والموظف الكبير بيمد ايده وكله ماشى بنظام فتح مخك ملعون ابو المخ اللى يتفتح بالشكل ده وملعون ابو الحياه اللى تبقا كلها فساد , هعيدها تانى انا مش ضدك ياريس ولا ضد الحكومه ولا ضد اى حد انا ضد اللى بيحصل وبمعادله بسيطه كدا هتبص تلاقى الرئيس هو اللى بيختار الحكومه والحكومه فيها الوزراء والمحافظين والذى منه وهما بردو اللى بيتحكموا فى 80 مليون مصرى وهتلاقى بردو ان الحكومه بتساعد على الفساد يبقا ياريس بالمنطق كدا أن السبب الرئيسي فى كل اللى أحنا فيه انت ياريس ايون انت ياريس

أنا بس هقول شئ صغير كدا يأكد كلامى ده رغم ان التاكيدات كتيييييييييير كتير اوى ياريس بس انا هقول عن شئ شفته فعلا تجار المخدرات فى البلد الحكومه اللى بتمولهم ايون هقولك اذاى متستعجلش عليا ياريس انا جايلك فى الكلام اهو’’ يجي الظابط من دول عاوز قضيتين تلاته عشان خاطر الترقيه والنجمه اللى هتتزفت ع كتف جنابه بيجيب مرشد ذى ما بيسموه وكمان بيعطوه مخدرات ويبدأ المعلم ده فى الشغل ويبيع لشباب بلدنا ويدمر شباب بلدنا فى حمايه الحكومه ( شالله ياحكومه) ويبدأ المعلم ده يتبع تعليمات جناب الظابط ويفضل الظابط يمسك شباب والمعلم يبيع ويبيع وفى الاخر يجيبوا مرشد تانى عشان يوقع المعلم الاولانى الدراع اليمين لجناب الظابط يقوم يهرب المعلم ويتمسك المرشد التانى مكانه لأنه مقدرش يسلمه ’’

أسمعنى ياريس دى حاجه بسيطه اوى من اللى بيحصل حكومتك ياريس هى اللى بدمر الشعب والشباب وانت ياريس السبب فى الحكومه دى يبقا ياريس لما حد يهاجمك ويقول حقيقه حكومتك متزعلش ده انت المفروض انك تدى ليه وسام الجمهوريه للشرف والامانه

امممممممممممممممممممم

بصراحه انا اتخنقت وانا بكتب الكلام ده اتخنقت على حال البلد اتخنقت عشان نفسي كان نفسي طول عمرى افضل فى بلدى أشتغل فيها وليها متغربش بعيد عن احبابى واصحابى وجيرانى بس نعمل ايه بقا

تعرف ياريس انا بشتغل بكام بره 1300 ريال يعنى حوالى 1500 جنيه وحياه ربنا ياريس انا لو كنت لقيت شغل فى بلدى ب1000 جنيه بس مش كنت سافرت ولا اتغربت .......

انا عارف انى احسن من غيري كتير ياريس مش مستنيك تقولى كدا والحمد لله حمدينه شاكرينه

انا كمان يمكن شاب صغير فى السن لسه بس ياريس فهمنى انت يمكن انا عقلى تخين ومش بفهم بسرعه لما يكون راجل عنده 4 عيال وأمهم وبياخد من الحكومه 480 جنيه فى الشهر بذمتك انت ياريس يعمل بيهم ايه يبقا لو مد ايده وقال رشوه المفروض ان مفيش حد يعاقبه ,وأقل منه كتييير وكتييير ...

ياريس ارجوك فوق بقا من الغيبوبه اللى انت فيها دى ايون غيبوبه وخلى بالك من مصر شويه ياريس الحقها قبل ما تغرق بيا وبيك ولا ياترى انت هتسافر على اى بلد اجنبيه وتقول ملعون ابو البلد يبقا مشربتش من نيلها ياريس تبقا وقتها مش ابن مصر ياريس كلنا ولاد مصر وكلنا خايفين على مصر لا انا عاوز ابقا رئيس ولا وزير ولا حتى غفير ياريس انا كل اللى عاوزه أعيش بكرامتى فى البلد.....

سامحونى يا جماعه الكلام اللى انا قلته ده مش خوف من حد ولا حتى مجامله لحد الكلام اللى انا قولته ده حقيقه لازم كلنا ناخد بالنا منها
حتى لو كلنا هندخل المعتقل حتى لو كلنا هنتحبس المهم يبقا ضميرنا مرتاح ونسيبها على الله

بدون تعليق

صباح الخير # ان شاء الله خير #

بصراحه كدا انا بقالى فتره مخنوق اوى والمدونه وحشتنى فالنهارده قلت

لازم أدخل وأحاول اتكلم معاها شويه اه طبعا اتكلم مع المدونه صدقونى هى الشئ

الوحيد اللى هقدر معاه الاقى نفسي مش مشكله بقا الاقى نفسي ف المعتقل ف امن الدوله

ولا حتى الاقى نفسي مع نفسي مش هتفرق كتير.....

وانا بتصفح النت لقيت كاريكاتير عجبنى مش هطول عليكم.....

وصدقونى الكاريكاتيرات دى بتعبر عننا وعن بلدنا بصدق

رحمه الله عليك يا ملك الكرامه والعزه

عندما قطع الملك فيصل رحمة الله عليه البترول في حرب أكتوبر

وقال قولته الشهيرة عشنا وعاش اجدادنا على التمر واللبن

وسنعود لهما

ويقول وزير الخارجيه الأمريكي الإسبق

كسينجر في مذكراته

أنه عندما إلتقى الملك فيصل في جدّه , عام 1973 م ,في محاوله لإثنائه

عن وقف ضخ البترول ,رآه متجهما ً , فأراد أن يستفتح الحديث معه بمداعبه,

فقال " إن طائرتي تقف هامده في المطار, بسبب نفاد الوقود ,

فهل تأمرون جلالتكم بتموينها ,

وانا مستعد للدفع بالأسعار الحره ؟ !

.يقول كيسنجر : " فلم يبتسم الملك ,بل رفع رأسه نحوي ,

وقال : وأنا رجل طاعن في السن ,وامنيتي أن اصلي ركعتين في المسجد الاقصى

قبل أن أموت فهل تساعدني على تحقيق هذه الأمنيه؟!

رحمه الله عليك يا امير الرجال وسلطان الكرامه وملك العزه

عمده عزبتنــــا ** والغفر

مساء النور انا كنت ناوى نكمل مع بعض

حكايه الغفير حبيب العادلى وعصابته مع أفراد عزبتنا

ونشوف ابو سحله ومعامله غفير نبطشى لشباب عزبتنا

بس سامحونى بقا لقيتنى فجأه كدا....

عقود عمل ع القفا بس العمل بره

هاجر وسيب البلد مفروشه للغربان

يعنى يا إما السجون يا الشنق يا الهجره

يا اما تهمه جنون يا العيشه ع الصلبان
يا اما تسْـكر وتسْـكر زيى ليل ونهار

ونهار وليل وانت شايف نكسه ع العتبه

اسقينى واعمينى لو حتى بميّه نار

علشان ما احسش بإن السيف على الرقبه

ولما اتعميت واتنيلت ع عيني.....

قلت احكي ليكم حكايه

عمده عزبتنـــا والغفر بتوعه

أسترها يااااااااااااااااااااارب

حــد يـغيتنـا حـد يلقينـا..... رضينا بالهم ومرضاش بينا

قولنا قريبنا طلع ناسينا..... واحنا اللي فينا يارب كافينا

بلدنا صبحت تارسينا ..... لَمه اللصوص ويا والينا

وقولنا موسي طلع فرعون..... جايب لنا راجل مجنون

وزير ثقافه بالدبلوم..... تقفله فرشه في البلعوم

يغرق في طشط ما يوعي يعوم..... و والينا دا ورينا فيه يوم

واكل بلدنا باللي فيها ..... ورانا يا ما من غير لزوم

وحميها هو حارميها ..... اشوفه ماشي من غير هدوم

يقلعها جنبه ومايلقيها ..... مجلس وزاره دايما ظريف

سلطانه دا طول عمره خفيف..... ورئيس وزارته اسمه نظيف

طول العمود ابيض ونحيف..... واخد الهندسه قال مالجربي

ونشوف دفاعنا وانتاجنا..... الحربي ووزيرها دا تاعب قلبي

حامي الحمي راجل هاوي..... واسمه حسين ال طنطاوي

ومسلح الجيش بمطاوي..... شايل في جيبه مسدس ميه

أحسنله يعمل عمليه..... بسيطه يقلب سعديه

ونروح وزاره الماليه..... ووزيرها دكتور بطرس غالي

خلى الجنيه فوق في العالي ..... لا يورو طايله ولا ياباني

منه الدولار بقي بيخاف..... والرحله لوزاره الاوقاف

لكل جامع 10 تلاف ..... ناموا المشايخ من غير لحاف

ووزيرها اصله من ربه بخاف ..... كبيرها حمدي باشا زقزوق

ومقر حكمه باب اللوق..... من مواليد الضهريه

وللحكومه مني التحيه,,,

ماعملو وزاره شئون قانونيه..... معاها المجالس النيابيه

ومن استشار عمره ما خاب ..... واسالوا مفيد شهاب

وهو بيسمع عمر دياب..... هل بلدنا مستكفيه ؟؟!!

هيقول خيبيتنا دي دوليه..... والشعب عايش عالتقليه

ويالله نروح الوراق..... نتمشي علي كورنيش النيل

إمبابه ارض العالميه ..... هناك وزاره ري قويه

ومعاها موارد مائيه..... واعمل عبيط يا عنيه

دا وليها محمود ابو زيد ..... خلى الاراضي صبحت بيد

والفلاحين بقوا عالحديد..... وللملوك صبحو عبيد

أنا نفسي احس بالامان ..... لاني ماشي في الشيخ ريحان

أتلم يا قلمي اهدي شويه..... دا انا جنب وزاره الداخليه

وخاف عليا م التعذيب..... دي ماسكها جينرالنا حبيب

طول عمره بيحب الخير ..... لأهلي واسمه حبيب باشا العادلي

آه لو تقروا اللي في قلبي..... شايل كتير ومخبي

وحياه راس والي الانتاج الحربي..... ولا بلاش راسه علشان بيزعل

دا الدكتور سيد مشعل..... ادعيله وقول ربك يقبل

ويبيع انتاجه علي طول..... وندور مين المسؤل

وفي انبي شوف واوعي تقول..... هتعدي علي وزاره البترول

مكتوب هناك لا للتدخين..... خايفين تولع في البنزين

بطل عربيتك ودا إنذار ..... اسعار البنزين صبحت نار

راح يعزموك علي شوب سولار..... ولما تخرج من انبي

سلملي علي سامح فهمي..... للغاز مالقاش أى سبيل

إلا بياعته لإسرائيل..... يارب امتي يبقي التعديل

دي حكومه مصر لا مش تونس..... ومعانا الدكتور احمد يونس

دايما بيمشي من غير بطاقه..... مهو والي الكاهربا والطاقه

ونروح 8 شارع عدلي ..... هناك وزاره تعاون دولي

وزيرتها ولا نجوم الدوري..... دايما تلقيها وزاره فاضيه

... وتايهه

وزيريتها السيده فايزه ..... كل الكلام ده علي مسامعي

والعدل في إيد ممدوح مرعي..... دي وزاره بجد هايله

آه والميزان كفته مايله..... وللشؤون الدوليه

عاملوا وزاره الخارجيه..... وليها ولا نطاط الحيط

واسمه احمد ابو الغيط ..... وخلي المصري بقي عبيط

لو في الزباله انت محتاس..... كلم بقي ماجد غطاس

والي على شئون البيئه..... وبلدنا محبوسه ودي حقيقه

مايعيش الكلب فيها دقيقه..... اما وزاره الاعلام

وزيرها ربه بيتقي ..... دا الدكتور انس الفقي

وأنا عمري ما اخاف مالتهويش..... ولا حتي من احمد درويش

دا والي التنميه الإداريه..... وكان بيحب سعديه

ساكنه في القريه الذكيه..... جنب وزاره الاتصلات

بالغم يا مصري انت موعود ..... دا وزيرها طارق محمود

باعوا البلد زي الخضار..... ودا في وزاره الاستثمار

لما مسكوها في يوم لأمين..... ما وزيرها صفوت محي الدين

ومن وزاره الاسكان..... الشعب كله قرفان

وللجواز مش لاقي مكان..... ولا حتي عشه بالطين

اصل وزيرها ولا بنيامين ...... واسمه احمد باشا امين

ولو مسافر مش هتلاقي الا الحنطور...... اصل القطر بقي محظور

ودا أمر من يونس منصور..... وزير النقل عبد المامور

ووزاره الصحه والسكان..... بتقول تنظيم الاسره حاجه جنان

ما فيش في بلدنا عيان ...... ولا عدوي بتيجي بالدور

ولا حتي انفلوانزا طيور..... وتصريحاتها من وزيرها حبيب قلبي

حاتم مصطفي الجبلي

ولان الشباب ع الوالي غالي..... عملوا وزاره تعليم العالي

فيها التعليم مجاني

ولأن الوالي ابن حلال..... مسكها لهاني هلال

لا ربطنا بالأغلال..... ولا قال الدبح حلال

دا والينا في شبابنا بيدادي..... ولا عمره اتنرفز لا هادي

جابلينا عائشه عبد الهادي..... قعدها علي باب المجره

خلاها وزيره قوي عامله وهجره..... وانا في السرفيس مش لاقي اجره

وانزل هنا لتحصل ازمه..... اصل السبعه الباقين مالهم لزمه

وانا لو هكمل ما هتضربهم غير بالجزمه

يا حكووومه عيب .... والله عيب

سا محونى انا مش هقول أي ابن هرمه

أنتو طبعاااا عارفين انه مش خوف

بس مهما قلت ومهما اتعصبت واتخنقت واتنرفزت

ممكن

أطق وأطق وأطق من غير ما حد يعبرنى ...

بس فجأه لقيتنى فرحت..... عارفين ليه

لأنى أتأكدت أننا لازم نطمن ان لو ميه النيل خلصت

عندنا مخزون إستراتيجي كبييييييييييييييير من الأهات والدمـــــوع

ربنا يخليلنا الحكوووووووووووووومه

خلونا بقا نشوف بعض الصور من عزبه مبــــارك

كل ده وأنا بخلى أمى كل يوم ع الصبح

وع غير ريئ تدعيلها وخالتى وعمتى وستى كمان

(( ربنا يخليكي لينا يا حكووووووومه ))

بعد ما امى دعت ليها بفتح الجرنال الصبح وبرده ع غير ريئ

كان فى إيدي جريده وطنيه قوميه حزبيه مباركيه مش صفره ربنا يكفينا شرها

المهم........

شوفوا كدا معايا أنا شفت ايه

والاهم من كدا

لو زعقنا صرخنا

اتنرفزن أتنيلنا أضربنا عن كل شئ ف الدنيا

إن سيدنا أيوه الرئيس بتاعنا أيون... صاحب المقام ...

..مالك عزبتنا

يسمعناااااا....

وحياه النبى سمحوه أصل جنابه والدادا بتاعته بتهشتكه وتشخلعه وقع ع ودنه

الكلام ده طبعا لما كان جنابه صغير

كفايه كدا النهارده

أصل الواحد نفسه غمه عليه...

مآساه حاره العواطليه........؟؟

كله كوم ورئيسنا كوم

كوم زباله كوم حماده

تلقي في عصره القهوة الزياده

بكيلو سكر وبردو ساده

خلا حارتنا حاره السعاده

عايشين ع الفول والطعميه

واللحمه يوم الاضحيه

ربي ما يقطعلكو عاده

بس بصراحه راجل تمام

وعصره ازهي من عصر خوفو

لله الشــــــهــــاده

كفايه شعبه بالع لسانه

وحاطط سِدادة

لو حد حاول في يوم يبوح باللي في قلبه

راح ينضرب علي دماغه بأوسخ بياده

يبقي ننافق جناب سعادته

ونقول جهوده ليها الاشاده

او نفوض امرنا لربنا ونعملها سايلنت

مهو حزب واحد هنا في بلدنا وليه السياده

ناجح تملي في الانتخابات من غير اعاده

واحنا يا ربي سبعين مليون

لكن يا عيني من غير اراده

ما رئيسنا ظالم ولا عتريس

وبلدنا صبحت بأمره فؤاده

حاكمنا بالنار والمتاريس

وكأنه اسطي في ورشه حدادة

شوف اي مصري واسأله

امتي تدوق طعم السعادة

هيرد دغري من غير دوران

لما المذيع في التلفزيون

يقول بيانا عاجل يا سادة

رحل الزعيم وابن الزعيم من غير افادة

وحيث جمعت اشلاؤهم من تحت عجله عربيه لادا

وتبقي دي هي السعادة

ودا كله طبعا هلوسات يوم برد جداااااااا

اصل عندي دور زغطه واسألو الدكتور عبادة

أه والنعمه هى دى كل الحكايه